Justizia herritarrengana hurbiltzen

Eusko Jaurlaritza

Martxoak 8, Berdintasuna ikasi egiten da. Irakatsi berdintasuna

Martxoaren 8rako eginiko kanpaina, Berdintasuna ikasi egiten da. Irakatsi berdintasuna.

Emakundek aurtengo emakumearen nazioarteko egunerako –martxoak 8–diseinatutako kanpainak zera eskatzen die pertsona helduei: belaunaldi gazteagoekin arduratsu jokatzeko eta egunero transmititzeko berdintasuna bizitzaren arlo guztietan.  Hala, “Berdintasuna ikasi egiten da. Irakatsi berdintasuna” lelopean, neskatilak eta mutikoak ditu protagonista, haien bidez gogorazten baitigu ikastaldi baten fruitu direla haien jarrerak, balioak, bizitzaren ikuspegia… 

Sentsibilizazio-kanpainak azpimarratzen duenez, berdintasunean oinarritutako balioak ez dira berez sortzen; berdintasuna ikasi egiten da, beste balio, jarrera edo gizartean jokatzeko modu batzuk ikasten diren bezala, eta, horrenbestez, pertsonen sozializatzearekin zerikusia duten eragile guztiek erantzukizun handia dute berdintasuna eta eredu berdintzaileak irakasterakoan, eta, zentzu horretan, bereziki belaunaldi gazteengan jarri behar dute arreta.   

Martxoaren 8rako eginiko kanpaina, Berdintasuna ikasi egiten da. Irakatsi berdintasuna.

Izan ere, kanpainaren aurkezpenean, Izaskun Landaida Emakundeko zuzendariak azaldu duenez, “ezin dugu gizarte berdintzailea eraiki, baldin eta eskolak, gurasoek, komunikabideek, enpresek, eta azken finean gizartea osatzen dugun  pertsona guztiok ez badugu erakusten, gure mezuen bidez, eta batez ere gure ekintzen bidez, errespetuan, pertsonen eskubideetan eta emakumeen eta gizonen arteko berdintasunetan oinarritutako balioak”.  Landaidak defendatu du, ildo horretan, gure gizartean berdintasunaren aurkako inertzia indartsuak finkatuta daudela kontuan hartuta, “berdintasuna irakatsi ezean, azkenean,  desberdintasuna ikasten dela”.

Martxoaren 8rako eginiko kanpaina, Berdintasuna ikasi egiten da. Irakatsi berdintasuna.

Zenbait egoera erakusten du kanpainak: esate baterako, gizonak etxeko lanak egiten eta seme-alabak zaintzen,  arlo bietan ardura parteka dezaten eta jarraitu beharreko eredu bilaka daitezen; edo beste egoera batzuk non emakumeak protagonistak diren gizonak nagusi diren eremuetan, esaterako, teknologian edo zientzian, eremu horietan ere emakumeak erreferentetzat jo ditzaten belaunaldi berriek.  Hala, bada, kanpainak azpimarratzen du zer garrantzitsuak diren helduek etxean, eskolan, kalean, telebistan edo interneten etxeko gazteei transmititzen dizkieten ereduak eta jarrerak.

Aurten, Emakunde- Emakumearen Euskal Erakundearen sorreraren 30. urtemugarekin bat egiten du kanpainak, eta txartelez gain, irratiko iragarkiak, iragarki-bandak eta bideo bat biltzen ditu. Otsailaren 27a eta martxoaren 13a bitartean garatuko da, kanpoko euskarrietan, komunikabideetan eta sare sozialetan.  Horrez gain, kartelak bidali dira erakundeetara, ikastetxetara, osasun zentroetara, elkarteetara, enpresetara, kultura-etxeetara, liburutegietara, eta abar.

Orobat, eta egunero belaunaldi berriei berdintasuna irakasten dieten bestelako jarrerak eta ekintzak erakuste aldera, herritarrak gonbidatuko dira sare sozialetan traola hau erabiltzera: #EnseñoIgualdad #BerdintasunaIrakastenDut.

Bestetik, martxoak 8rako iragarrita dagoen greba feministari buruz galdetuta, Izaskun Landaidak adierazi du Emakundek bat egiten duela mugimendu feministaren aldarrikapenekin, izan ere,  "duela 30 urte Emakunde sortu zenetik mahai gainean izan dituen aldarrikapenak dira, eta berdintasun politikak bultzatuz hauek zuzentzeko helburuarekin egiten du lan Emakundek egunero" eta azpimarratu da ez dela ohiko greba bat, lan mundutik harago duelako eragina,  eta mugimendu sozialak deituta dagoelako mundu mailan. Landaidak adierazi duenez, "ezin da ulertu greba tradizional bat bezala, planteamendu berritzaile eta zabalagoa da,  ez baita bakarrik lan munduko egoeran zentratzen, baizik eta kontuan hartzen ditu adibidez, zaintza mundua. Ikutarazi nahi du inbisilizatua dagoen lan bat, zaintzaren eta etxeko lanena, gehiengo handi batean emakumeek egiten dutena, eta ikusezina izateaz gain, gizarte honek behar bezala baloratzen ez duena".

2018ko otsailaren 27ean argitaratua. Honi buruz gehiago irakurri:  Eusko Jaurlaritza. Iruzkin bat egin.
  • Partekatu:
  • Email
  • Twitter
  • Facebook

Justizia zuzendaritzarentzako saria

Justizia zuzendaritzarentzako saria

María Jesús San José Eusko Jaurlaritzako Lan eta Justiziako sailburuak jaso du Eusko Jaurlaritzaren Justizia Zuzendaritzari emandako merezimendu profesionalen ondoriozko domina. Aintzatetsi dute Justizia Zuzendaritzak “auzitegi barruko bitartekaritzaren sustapenean egin duen ekarpen handia eta izan duen konpromisoa”.

Ekitaldi horretan, San José sailburuak Euskadiko Justizia Konpontzaileko Zerbitzu berriaren garrantzia nabarmendu du. Diseinatu den zerbitzu hori izango da, hain zuzen ere, Europako justizia konpontzaile integraleko auzitegi barruko lehen zerbitzua, eta prozesu penalaren barruan txertatuko da. “Une honetan, duela hamarkada bat hasitako bideari jarraipena emateko erantzukizuna dugunok interes argia dugu hiritarrei eskaintzen diegun zerbitzua etengabe hobetzeko”. Aditzera eman duenez, gizarte-harremanak lehengoratzean, bakegintzan, konponketan eta erantzukizunean oinarritzen da justizia konpontzaileak bultzatzen duen justizia. “Justiziak —erantsi du— gatazkan nahastuta dauden pertsonen beharrak hartzen ditu kontuan, eta komunikazio-espazioak artikulatzen ditu. Komunikazio-espazio horietan sustatuko da eztabaiden konponbide elkarrizketatua, biktimak jasandako kaltearen konponketa, biktimen gizarteratze positiboa eta erkidegoko gatazken baketzea”.

Bitartekaritzako eta Gatazken Konponketako Espainiako Eskolak eta haren Diario de Mediación egunkari digitalak antolatutako ekitaldia egin da Madrilgo Ekitaldi Zentroan. Ekitaldi horretan saritu dituzte, besteak beste, Luis Aurelio González Bitartekaritzaren Aldeko Magistratuen Europako Taldeko Espainiako presidentea, Granada Emilio Calatayud adingabeen epailea, Paulino Fajardo abokatua eta bitartekaria, eta Pedro García Aguado waterpoloko jokalari olinpiko ohia eta telebistako profesionala.

Bitartekaritza Euskadin

Epaimahaiak Eusko Jaurlaritzako Justizia Zuzendaritzaren lana saritu du, eta, horretarako, aitzatetsi du Justizia Zuzendaritzaren “ibilbidea, ahalegina eta gatazkak konpontzeko metodo alternatiboak ezartzen jarraitzeko borondate argia”. Euskadin, 2007an eman zitzaion hasiera esperientziari, Auzitegi Barruko Zerbitzuaren sorrerarekin. Zerbitzu horrek deribazio judizial bidez soilik esku hartzen du, eta fiskaltzaren adostasunarekin. Hasiera-hasieratik elkarlanean jardun du Botere Judizialaren Kontseilu Nagusiarekin, urteko memoriak prestatzeko lanean zein ereduen eta protokoloen diseinuan. Botere Judizialaren Kontseilu Nagusiak berak emandako datuen arabera, Euskadin egiten da Espainia osoan egiten diren bitartekaritzen % 60. Euskadi erreferentziazko eredua da Justizia Konpontzailean; izatez, Euskadik diseinatu du prozesu penalean txertatzen den Europako justizia konpontzaile integraleko auzitegi barruko lehen zerbitzua.

Justizia Konpontzailearen lehen birtualitatea da biktima kokatzen duela sistemaren oinarrian, 2015eko apirilaren 27ko Biktimen Estatutu Juridikoaren Legeak eskatzen duen bezalaxe. Izan ere, Lege horrek arautzen du biktimak eskura izatea Justizia Konpontzaileko Zerbitzuak —jasan duen kaltea konpon dakion— eta, horrez gain, Lege horrek lehen aldiz arautzen du, modu integralean, biktimak prozesu penalean duen parte-hartzea; biktimak egiteko aktiboa eta protagonismo handiagoa izango du prozesuan, kaltea legezko baldintzetan ez ezik, baldintza moral eta emozionaletan ere konpon dakion.

Arlo penalean, organo judizialen eta hiritarren esku jartzen du bide judiziala osatuko duen metodo osagarri bat, epaitegietara eta auzitegietara iristen diren gatazkak kudeatu ahal izango dituena. Delitu bat egin duen pertsona eta haren biktima beren borondatez jar daitezke haien gatazka konpontzeko saio baten mende, zenbait teknika konpontzaileren bidez (bitartekaritza, zirkuluak edo hitzaldiak). Pertsona arau-hausleari egindakoaz eta eragindako kalteaz edo galeraz modu eraikitzailean erantzuteko aukera eskainiko zaio, eta biktimari protagonismoa emango zaio gatazkaren transformazioan eta ebazpenean.

Familiaren esparruan, familia- eta gizarte-harremanen konpontzailetzat jotzen da, baita familiaren etorkizuneko erabakien erantzuletzat ere, elkarbizitza hautsi den egoera baten ondoren edo familiako kideen inguruabar pertsonalak eta/edo ekonomikoak aldatu diren egoera baten ondoren, tartean adingabeko seme-alabak daudenean edo zaurgarritasun-egoera berezi batean daudenean. Zehazki, oinarritzen da gurasoen baterako erantzukizunean, adingabeekin eman beharreko denboraren banaketan, familia-etxebizitzaren erabileraren esleipenean, adingabeen gastuen kuantifikazioan eta banaketan eta bikotekideen arteko konpentsazio ekonomikoan.

2018ko urtarrilaren 22ean argitaratua. Honi buruz gehiago irakurri:  Justiziarekin elkarlana. Iruzkin bat egin.
  • Partekatu:
  • Email
  • Twitter
  • Facebook