Justizia herritarrengana hurbiltzen

Eusko Jaurlaritza

UPV-EHU-ko Berdintasuneko eta Deustuko emakumeen kontrako indarkerian esku hartzeko masterrek Emakunde saria jaso dute

UPV-EHU-ko Berdintasuneko eta Deustuko emakumeen kontrako indarkerian esku hartzeko masterrek Emakunde saria jaso dute

UPV/EHUko Emakumeen eta Gizonen arteko Berdintasuna: Berdintasunaren Eragileak Masterraren arduradunek, Arantxa Elizondok eta Arantxa Camposek, eta Deustuko Unibertsitateko Emakumeen Kontrako Indarkerian Esku hartzeko Masterraren zuzendariak, Raquel Royok, Berdintasunerako Emakunde saria jaso dute Iñigo Urkullu Lehendakariaren eskuetatik.

Emakunde sariko epaimahaiak nabarmendu du gaur egun berdintasun-politiketan lan egiten dutenek, master horien bidez, beren lana goi-mailako prestakuntzarekin bete dezaketela eta beren jardueran beharrezko genero-ikuspegia sar dezaketela.

Lehendakariak azpimarratu du prestakuntza berdintasun-politiketan aurrera egiteko ezinbestekoa dela. Zentzu honetan, Lehendakariak gogorarazi du gizarteko arazoak konpontzeko, gizartea ulertu eta aztertu behar dela, horretarako, Lehendakariaren ustez, tresnak behar dira eta eskuratzeko beharrezkoa da kalitatezko prestakuntza. “Argi dugu Unibertsitatearen eta prestakuntzaren indar eraldatzailea”, esan du. Lehendakariak adierazi du saritzen diren ikasketa hauei esker, profesionalek genero ikuspegia kontuan izanda hartzen dituztela erabakiak. Gainera, ikasleek jasotako jakintza gizarte berri bat eraikitzeko lan tresna paregabea dela nabarmendu du. Era berean, Lehendakariak esan du bi masterrak Euskadin, eta nazioartean ere, berdintasun-politiken arloan gizarte-erreferente bilakatu direla.

Bestalde, Izaskun Landaidak, Emakundeko zuzendariak, prestakuntzaren efektu eraldatzailea azpimarratu du eta berdintasunaren inguruko prestakuntza espezializatuaren beharra. Honekin batera, Landaidaren ustez, beharrezkoa da hezkuntza eskaintza guztian ere, berdintasuna eta genero ikuspegia zeharka txertatzea.

Erreferente akademikoa

UPV-EHUko Berdintasunaren masterra 2001ean sortu zen eta, harrezkero, erreferente akademikoa da gaian, eta diziplinarteko prestakuntza teoriko eta praktiko zabala du, ikuspegi feministatik. Bereziki sakontzen du berdintasun-politiketan, eta, horretarako, erakunde-eremuan erabiltzen diren tresnak eta neurri zehatzak ematen ditu ezagutzera. Halaber, erakunde publiko edo pribatuetan berdintasun-agente diren edo izateko aukera edukiko duten ikasleek prestakuntza hobea izateko zeharkako beste gaikuntza batzuk eskaintzen ditu. Gainera, master horren esparruan emakume eta gizonen berdintasunaren aldeko lanean inplikatuta dauden pertsonen sarea sortu da.

Deustuko Unibertsitateko Emakumeen Kontrako Indarkerian Esku hartzeko Masterra, 2003tik, erreferente aitzindaria eta paregabea da emakumeen kontrako indarkerian esku hartzeko arloko prestakuntza berezia eskaintzen, gaian dagoen gizarte-eskari handiari erantzuteko.  Hori horrela, honetan ere diziplinarteko ikuspegitik, ikasleei gaikuntza ematen die ikuspegi holistikotik esku-hartzeak diseinatzeko, planifikatzeko, kudeatzeko, gauzatzeko eta ebaluatzeko beharrezko gaitasunak berengana ditzaten. Gaian ikerlan aplikatu eta hausnarketa-lan ugari sortu ditu, masterreko amaierako tesinen bidez.

Epaimahaiak, hori guztia kontuan hartuta, honako hau nabarmendu du: batetik, berdintasuneko eta emakumeen kontrako indarkerian esku hartzeko prestakuntza espezializatuaren eta kalitateko prestakuntzaren aldeko apustua. Era berean, master horiek duten eragin biderkatzailea nabarmendu du, izan ere, horrek laguntzen du gaur egun berdintasun-politiketan –bai sektore publikoan, bai pribatuan– lan egiten duten pertsona askoren lanbide-eginkizuna goi-mailako prestakuntzarekin eta prestigioarekin egin ahal izateko eta jardueran behar den genero-ikuspegia txertatzeko. Gainera, bestetik, irakasleen artean eta ikasleen artean ezagutza feministaren eta akademikoaren eremuan aliantzak sortu direla nabarmendu du. Azkenik, bi master horiek Euskaditik kanpora eta Euskadin bertan berdintasun-politiken arloan gizarte-erreferente bilakatu dira.

Sari honen bidez, epaimahaiak, gainera, aintzatespena egin nahi die, halaber, modu batera edo bestera bi master horietan parte hartu duten edo parte hartzen duten pertsona guztiei, bereziki ikasleei, beren eragin-eremuetan goi-mailako prestakuntza, profesionalizazioa eta kontzientzia duten aldaketa-eragileak izateko prestakuntza hori berenganatzea erabaki dutelako.

2019ko apirilaren 30ean argitaratua. Honi buruz gehiago irakurri:  Eusko Jaurlaritza. Iruzkin bat egin.
  • Partekatu:
  • Email
  • Twitter
  • Facebook

Eusko Jaurlaritzak Administrazio Judizial Elektronikoaren Estatuko Batzorde Teknikoaren biktimei ematen zaien laguntza hobetzeko lantaldea gidatuko du

Eusko Jaurlaritzak Administrazio Judizial Elektronikoaren Estatuko Batzorde Teknikoaren biktimei ematen zaien laguntza hobetzeko lantaldea gidatuko du

Eusko Jaurlaritzako Lan eta Justizia Sailak Administrazio Judizial Elektronikoaren Estatuko Batzorde Teknikoak (AJEEBT) sortu duen biktimei ematen zaien laguntza hobetzeko lantaldea gidatuko du. Lantalde berriak, erabiltzaileei zerbitzu ahalik eta osoena emateko helburuarekin, biktimei  laguntzeko bulegoetan behar diren hobekuntza teknologikoak aztertuko ditu, beti ere, dibertsitate funtzionala duten norbanakoei, adingabeei eta genero indarkeriaren edo terrorismoaren biktimei arreta berezia eskainiz.

Horrela adostu du AJEEBTren Batzorde Iraunkorrak, otsailaren 6an Logroñon.  Batzarrean parte hartu dute, ministerioko kideez gain, Botere Judizialaren Kontseilu Nagusiaren ordezkariek, Estatuko Fiskaltza Nagusikoek, justizia administrazioaren letraduen kidegoak, eta justizia eskumena duten autonomia erkidegoek, Kataluniak eta Galiziak ezik. Azken bi hauek Nafarroa izan dute ordezkari.

Eusko Jaurlaritzak Justizia Ministerioarekin elkarlanean gidatuko du lantaldea, eta organo judizialek delituen biktimekin duten harremana hobetzeko zein bitarteko teknologiko ezar daitezkeen aztertuko du, 4/2015 Lege Organikoak, Biktimaren Estatutua arautzen duena, betez.

Arau horretan biktima guztiek dituzten eskubideen zerrenda jasota dator. Estatutuaren ezarpena hobeezina izan dadin, kudeaketa prozesalerako sistema ezberdinetan ezarri behar diren baliabide teknologiko egokienak bilatuko ditu AJEEBTk. Estatutuak, besteak beste, hurrengo eskubideak aitortzen dizkie biktimei: ulertzeko eta ulertua izateko eskubidea, informazioa jasotzeko eskubidea, babes-eskubidea, zigor-arloko prozesuan aktiboki parte hartzeko eskubidea eta errespetuzko tratu profesionala, indibidualizatua eta ez diskriminatzailea jasotzeko eskubidea.

2019ko otsailaren 8ean argitaratua. Honi buruz gehiago irakurri:  Justizia digitala. Iruzkin bat egin.
  • Partekatu:
  • Email
  • Twitter
  • Facebook