Justizia herritarrengana hurbiltzen

Eskubideak pausoz pauso XIII: Etxebizitza eskubidea

Etxebizitza eskubidea

Etxebizitza duin baterako eskubidea nazioarteko hainbat hitzarmenetan jasota dago, besteak beste, NBek 1966an onartutako Ekonomia, Gizarte eta Kultura Eskubideen arloko Nazioarteko Itunean.

Gurera etorrita, zehazki, etxebizitza eskubidea Espainiako 1978ko Konstituzioaren 47. artikuluan jasota dator, eta Konstituzioaren ondoren eskubide horrekin lotutako hainbat Lege onartu dira, azkenak Higiezin Kredituko Kontratuak arautzen dituen 2019/5 Legea eta Euskal Autonomia Erkidegoari dagokionez, 2015eko Euskadiko etxebizitza legea.

2020ko azaroaren 16ean argitaratua. Honi buruz gehiago irakurri:  Erreportajeak. Iruzkin bat egin.
  • Partekatu:
  • Twitter
  • Facebook

Izapide berria JustiziaEus-en: Nola eskatu zure sexu-delituen ziurtagiria, pausoz pauso

Sexu-delituen ziurtagiria eskatzea.

Adingabeekin ohiko harremanetan lan egiten baduzu, ezinbestekoa da zure enpresari sexu-delituen ziurtagiria aurkeztea. Dokumentu horrek, sexu-delituekin lotutako aurrekaririk ez duzula egiaztatzen du. JustiziaEus atarian, eskabidea egiteko jarraitu behar dituzun pausuak azalduko dizkizugu.

Identifikazio elektroniko bat baduzu, modu telematikoan eska dezakezu zure sexu-delituen ziurtagiria, Justizia Ministerioaren egoitza elektronikoaren bidez. Behin eskaera eginda, SMS bat jasoko duzu esteka batekin; esteka horren bitartez ziurtagiria pdf formatuan deskargatu behar duzu.

Eskaera internet bidez egitea ezinezkoa bazaizu,  eskabidea aurrez aurre izapidetu beharko duzu Euskal Autonomia Erkidegoko Bizkaiko Lurralde Kudeatzailetzan edo Gobernuaren Gipuzkoako eta Arabako Ordezkariordetzetan. Kasu horretan, dagokion hitzordua eskatu beharko duzu:

Nolanahi ere, ez zaizu inprimatutako dokumenturik emango, nahiz eta eskabidea aurrez aurre egin. Eskaera egiten duzunean, dela Justizia Ministerioaren egoitza elektronikoaren bidez, dela zuzenean, SMS bat bidaliko dizute. Mezuan datorren estekaren bitartez ziurtagiria doan deskargatu dezakezu.

2020ko azaroaren 11ean argitaratua. Honi buruz gehiago irakurri:  JustiziaEus-eko zerbitzuak . Iruzkin bat egin.
  • Partekatu:
  • Twitter
  • Facebook

Ezkontza batera gonbidatu gisa joan naiteke egungo alarma-egoeran?

Ezkontza batera gonbidatu gisa joan naiteke egungo alarma-egoeran?

Ezkontza zibil edo erlijioso batera gonbidatu bazaituzte, kontuan izan behar duzu une honetan joan-etorriak zure udalerriaren barruan edo ondoko udalerrietara bakarrik egin daitezkeela.

Hortaz, ezkontza zure udalerrian edo alboko udalerriren batean egiten bada, zeremoniara joan zaitezke, betiere higiene- eta osasun-neurriak eta ezarritako edukiera errespetatuz.

Gonbidatu zaituzten ezkontza bizi zaren udalerrian edo udalerriarekin muga egiten ez duen herri batean bada, bigarren mailara arteko ezkongaien senitartekoa bazara bakarrik joan ahal izango zara gonbidatu gisa. Hau da, lagunak ezin dira ezkontzara, ezkontza egingo den udalerri berean edo ondoko udalerri batean bizi ez badira.

2020ko azaroaren 10ean argitaratua. Honi buruz gehiago irakurri:  Covid-19. Iruzkin bat egin.
  • Partekatu:
  • Twitter
  • Facebook

Adineko emakumeek jasaten duten indarkeria ezkutuena ikusarazteko kanpaina egin du Emakundek

Emakunde

Izaskun Landaidak eta Zuriñe Elordik,  Emakundeko zuzendariak eta idazkari nagusiak hurrenez hurren, azaroaren 25a, Emakumeen aurkako indarkeria ezabatzeko Nazioarteko Eguna, dela eta diseinatutako kanpaina aurkeztu dute gaur goizean. Emakundek eta Berdintasun, Justizia eta Gizarte politiketako Sailak bultzatutako kanpaina hau ez da ohiko kanpaina bat; izan ere, Emakundek 55 eta 79 urte bitarteko emakumeekin egin duen prozesu baten emaitza da, eta urte askoan bizi izandako indarkeria ezberdinen benetako testigantzekin eratu da. Emakumeak eurak dira kanpainaren protagonistak, eta eurek hautatu dute kanpainaren mezu nagusia zein izan behar duen: euren ikusezintasunarekin bukatzea eta gizarteari dei bat egitea bizi izan dituzten eta bizi dituzten egoerei adi egon dadin.

Kanpainaren leloa da "Entzunez gero, ikusiko duzu. Soilik adi dagoen gizarte batek antzeman dezake indarkeria ezkutuena ", eta gizartea sentsibilizatu nahi du eta enpatia areagotu adineko emakumeen aurkako indarkeriaren inguruan, bereziki kontuan hartuta haien egoeraren zaurgarritasuna, besteak beste, biktimak ikusezinak direlako. Kanpainak, zentzu horretan, lagundu nahi du kasuak detektatzen eta emakume nagusiei errazten baliabide espezializatuetara gerturatzea.

Kanpainaren helburua da erakustea genero-indarkeria hainbat adinetako emakumek jasaten dutela (ez bakarrik emakume gazteek edo adin ertainekoek, komunikabideek eta kanpaina instituzionalek nagusiki nabarmendu izan duten bezala), baita adineko emakumeak ere. Eta honekin batera, adineko emakumeen aurkako indarkeriak bere berezitasunak dituela: ikusezintasuna; sistema patriarkal batean sozializatuak izana, non senarrei baimena eskatu behar zieten atzerrira joateko, lan egiteko edo banketxean kontu korronte bat irekitzeko; kasu gehienetan, autonomia ekonomikorik eza; euren garaiko gizarteak genero-indarkeria aintzat hartu ez izana, bizitza oso bat beste pertsonak zaintzen egon izana… Adineko emakumeak askotarikoak izan arren eta guztiak profil berekoak ez izan arren, adinak euren zaurgarritasunean eragina du.

Kanpainak 55 eta 79 urte bitarteko zazpi emakumeren testigantzak erabili ditu. Zazpi horietatik bik, indarkeria psikologikoaz gain, indarkeria fisikoa ere jasan dute. Euren testigantza ematea ez da batere erraza izan emakume horientzat, baina guztiek "beste emakume batzuei laguntzeko" helburuarekin egin dute. Hauek dira prozesuan zehar jasotako lekukotzetako batzuk:

  • "Edo zure lagunak edo ni" esan zidan. Ahoa irekitzen nuen eta dena iruditzen zitzaion gaizki. Eta gero eta txikiagoa egiten zara.
  • Berak ez zidan inoiz eraso fisikorik egin, baina badira sendatzeko denbora gehiago behar duten orbainak
  • Ez zen kolperik izan, berak ez ninduen jotzen, dena oso arrunta zen, baina bata bestearen atzean. Eta nabaritzen duzu zerbait ez doala ondo, baina ezin diozu izenik jarri.
  • Kontsulta batera joan nintzen, ni erotuta edo zoratuta nengoela pentsatuta. Han esan zidaten tratu txar psikologikoak jasaten nituen emakumea nintzela
  • Nire figurazioak zirela uste nuen. Uste nuen nik aldatu behar nuela, garaitua sentitzen nintzen, kaletik nenbilenean pentsatzen nuen: ez al dit inork lagunduko?
  • Kaletik jarraitzen zidan, Metrotik jarraitzen zidan, jazarpena etengabekoa zen.
  • Laneko afari bat nuenean esaten zidan "Ez dakit zer egin behar duzun hor". Ez nuen onartzen bizitza bat kanpoan izatea.
  • Igual ni kalera  makillatuta ateratzen nintzen, eta horrela zidan: fulanak bakarrik margotzen dira horrela, zoaz etxera aurpegia garbitzera. Eta ni itzuli egiten nintzen.
  • Zaborra jaisten nuen, eta norbaitekin hitz egiten geratuz gero, interfonotik deitzen zidan igotzeko.

Kanpaina azaroaren 9a eta 25a bitartean hedatuko da telebista, irrati, medio off-line ta online eta sare sozialen bidez.

2020ko azaroaren 9ean argitaratua. Honi buruz gehiago irakurri:  Genero-indarkeria. Iruzkin bat egin.
  • Partekatu:
  • Twitter
  • Facebook

Badakizu zenbat urte eman behar dituzun Espainian Espainiako nazionalitatea eskatzeko?

Bertan bizitzeagatiko nazionalitatea

Espainiako nazionalitatea lortzeko funtsezko baldintzetako bat Espainian bizi izandako urteei dagokie. Oro har, pertsona interesduna hamar urtez Espainian bizi izatea eskatzen da, legez, modu jarraituan eta eskaera egin aurretik.

Baina Espainiako nazionalitatea eskatu ahal izateko, ez da beti bizileku-urte kopuru bera eskatzen. Zenbait salbuespen daude eta horien arabera bizilekuan emandako urteen kopurua murriztu egiten da:

Bost urte eskatzen zaizkie: errefuxiatu izaera lortu dutenei.

Bi urte eskatzen zaizkie: Iberoamerikako, Andorrako, Filipinetako, Ekuatore Gineako, Portugalgo edo jatorri sefardiko pertsonei.

Urtebete eskatzen da: Espainiako lurraldean jaio bazara, bere garaian Espainiako nazionalitatea aukera bidez eskuratzeko eskubidea baliatu ez baduzu, edo Espainiako herritar edo erakunde baten tutoretza, zaintza edo harreraren mende legez egon dena bi urtez jarraian. Urtebete eskatzen da, halaber, eskabidea egiteko unean espainiar batekin ezkonduta urtebete daramanarentzat eta legez edo egitez bananduta ez dagoenarentzat, bai eta espainiar baten alargunarentzat ere, baldin eta ezkontidea hiltzeko unean egitez edo judizialki bananduta ez bazeuden. Era berean, Espainiatik kanpo jaioak, aita edo ama (Espainiatik kanpo jaioak), aitona edo amona (betiere jatorriz espainiarrak izan badira) jaio diren pertsonek Espainiako nazionalitatea eska dezakete, urtebetez Espainian bizi badira.

2020ko urriaren 22ean argitaratua. Honi buruz gehiago irakurri:  Ba al dakizu?. Iruzkin bat egin.
  • Partekatu:
  • Twitter
  • Facebook