Justizia herritarrengana hurbiltzen

Eusko Jaurlaritzak Justizia alorreko Jardunbide Egokiei sari bat jaso du, prestakuntzan eta ezagutzaren kudeaketan egindako jardunbideengatik.

2008-2010 formakuntza planak

Justizia Ministerioak Eusko Jaurlaritzaren ekimen bat saritu du, Justizia Alorreko Jardunbide Egokiei Sarien lehen edizioan. Prestakuntza eta ezagutzaren kudeaketa arloetan proiektu berritzailea da, eta Justizia Administrazioko funtzionarioei zuzendutako tutoretza pertsonalizatuak eta on line prestakuntza ikastaroak jasotzen ditu bere baitan.

Eusko Jaurlaritzako Justizia Sailburuordetzak uste sendo bat du: Erakunde batek kalitate-parametroekin funtziona dezan, eta zereginak eraginkortasunez bete ditzan, ezinbestekoak dira gaikuntza eta prestakuntza egokiak. Horregatik jarri zuen abian saritua izan den jarduera-ildoa, eta funtzionarioek, batez ere bitartekoek, hasieratik zereginak eraginkortasunez gauzatzeko gai izatea lortu du. 

Tutoretzak eta online ikastaroak

Pertsona bat Justizia Administrazioan lanpostu berri batean hasten bada, eta jurisdikzio edo arlo batean esperientziarik ez badu, bete behar dituen zereginetan lankide batek trebatu dezan eska dezake. Tutoreak horretarako bereziki sortutako poltsa batean daude. Poltsa horretan jurisdikzio zehatz batzuetan ekarpenak borondatez egiteko  prest dauden funtzionarioak daude. Horien ardura, ikasleek dagokien lanpostuko betebeharrak eta oinarrizko jurisdikzioa ahalik eta azkarren ikas dezaten da. 

On line ikastaroak bitarteko funtzionario batzuei zuzenduta daude; hain zuzen ere lan poltsetatik deitzen direnak eta inoiz ez dutenak denbora luzez edo behar adina denboraz hutsik dagoen lanpostu horretan  lan egin. Derrigorrezkoa da pertsona horiek e-learning plataforma bidez ematen den formazio-ikastaro batetan parte hartzea. 

Bulego Judizial eta Fiskalaren Zuzendaritzak garatutako prestakuntza jarduera hauei buruz gehiago jakin nahi  baduzu, sartu Justizia.net atariko Bulego Judizial Berriaren atalean. Eta Eusko Jaurlaritzak Justizia alorreko Jardunbide Egokien Sarien Lehenengo edizioan saritutako proiektuak ezagutu nahi badituzu, irailaren 22ko JUS/2652/2011 Agindua begiratu.

2011ko urriaren 18ean argitaratua. Honi buruz gehiago irakurri:  Eusko Jaurlaritza. Iruzkin bat egin.
  • Partekatu:
  • Email
  • Twitter
  • Facebook

Ziurtagiriak, klik egin besterik ez

Ziurtagiriak, klik egin besterik ez

Etxeko sofatik, bulegotik, liburutegitik edo merkatal gunetik. Izena, abizenak edo ezkontza zibileko zein naziotasuna eskatzeko ziurtagiriak lortzeko, internetera konexioa duen ordenagailua bakarrik behar duzu. Lekua, zuk zeuk aukeratu. Klik egin, eta kito.

Horrela ez duzu Errejistro Zibilera joan beharrik izango; ziurtagiriak lortzeko leihatilan xahutu beharreko denbora eta nekea, beraz, beste garai bateko kontu bilakatu dira. Zerbitzu Publikoak teknologia berrietara egokitzen ari dira, eta Justizia Administrazioa ere ez da atzean gelditu.

Badira 7 urte Justizia.net atariaren bidez jaiotza, ezkontza eta heriotza ziurtagiriak online eskatu ditzakezuna 2010. urtean EAEn 54.826 ziurtagiri eskatu ziren, horietatik 31.217 jaiotza ziurtagiriak, 6.405 ezkontza ziurtagiriak eta 17.204 heriotza ziurtagiriak izan ziren.

Sistema berri hau herritarrentzat onuragarria izateaz gain, Errejistro Zibileko eta Bake Epaitegietako langileei ere onurak ekarri dizkie; izan ere, lehen artxibategira jo, dokumentua bilatu, fotokopiatu eta ziurtagiria egin behar zuten, eta horretarako hamar-hamabost minutu behar zituzten. Gaur egun, jaiotza, ezkontza eta heriotza ziurtagiriak digitalizatuta daude (jaiotza eta ezkontza ziurtagiak 1950etik aurrera eta heriotza ziurtagiriak, 1990etik aurrera). Beraz, langileek datu basean bilatu besterik ez dute egin behar, eta horretarako minutu batekin nahikoa da.

Horren ondorioz, Errejistro Zibilera jotzen duten pertsonek ere denbora gutxiago itxaron behar dute Lehen ordubetez itxaron behar bazen, egun 5 minutu behar dira, beti ere eskaera eguna eta orduaren arabera.

2011ko urriaren 14ean argitaratua. Honi buruz gehiago irakurri:  JustiziaEus-eko zerbitzuak . Iruzkin bat.
  • Partekatu:
  • Email
  • Twitter
  • Facebook

Hizkuntza juridikoak ulertezina behar du izan?

“Justizia berria herritarrentzat ulergarria den justizia da”. Hau da aditu batzorde batek hizkuntza juridikoaren eraberritzeari buruz  egindako txostenaren ondorio nagusietako bat.

Justizia Ministerioak duela gutxi argitaratutako ikerketa honetan, idatzitako testuen ulergarritasuna eta zuzentasun linguistikoa lortzeko aholkuak ematen dira.  Abokatuei, prokuradoreei, epaileei, gizarte graduatuei  eta Justizia Ministerioari zuzenduta dago eta gaztelaniaz egin behar ez denari buruzko hamaika adibide aurkitu daitezke bertan. 

Txostenean jorratzen den gaietako bat gramatika da.  Adibidez,  juristek paragrafo bat idazten dutenean ohikoa da puntuaziorik ez jartzea, eta amaigabeko esaldiak osatzea; hona hemen gaztelaniazko adibide bat:

“Se sostiene por la parte actora que el sindicato USCA ha sido objeto de discriminación, pero para que pueda apreciarse la existencia de esta situación, lo primero que se precisa es que se fije un término comparativo, estableciendo respecto a qué o a quien se discrimina, lo que omite la actora ya que se limita a referirse a que el comportamiento de la demandada constituye una exclusión y un rechazo de esta entidad sindical, con el propósito de entorpecer y desprestigiar la actividad sindical de USCA , y ello resulta sumamente difícil teniendo en cuenta que más del 95% de los controladores aéreos de AENA están afiliados a este sindicato.”

Gaztelaniazko paragrafo hauek ulertezinak dira edonorentzat. Testuan puntuak falta dira eta komak soberan daude, eta ongi ulertzeko gutxienez  bi alditan irakurri behar da .

Horrez gain, juristen artean latinezko esamoldeak erabiltzea ere oso ohikoa da. Gai hau txostenean honela argitzen da: latinezko esamoldeak ezin dira ekidin, baina behintzat  parentesi artean itzulpena jarri behar da.

  • Ab intestato:( norbait testamentua egin gabe hiltzen denean)
  • Ad hoc (helburu bat lortzeko ekintza edo bitarteko bat egokia denean)
  • De iure (legeekin bat datorrena)
  • Iuris tantum (aurkako probak onartzen dituena)

Argi dago  testu juridikoak ez direla inoiz kaleko hizkeraz idatziko. Testuek oso zehatzak izan behar dute eta terminologia juridikoa erabiltzea ezinbestekoa da. Baina honek ez du esan nahi beste hizkuntza batean idatzita diruditen testuak sortu behar direnik. Herritar gehienek ez dute arlo juridikoa ezagutzen, eta Justiziako profesionalek hauen lekuan jarri behar dute idatziak, eskabideak, eta herritarrek erabiliko dituzten idazkiak prestatzerakoan.

Euskarazko testu juridikoek, gainera, gaztelaniazko testuek dituzten antzerako arazoak eta bestelakoak ere badituzte. Izan ere, gaur egun oraindik ere euskaraz idatzitako testu juridiko gehien-gehienak euskarara egindako itzulpenak dira. Eta erdaraz idatzitako testu juridiko bat hizkuntzaren aldetik  txarra bada, nekez eska diezaiokegu itzultzaileari euskarazko bertsio egoki eta ona egiteko. Hala eta guztiz ere, ez dira gutxi euskarazko idazkiak herritarrei hurbiltzeko eta testu juridikoak ahalik eta argien eta zehatzen idazteko egiten diren ahaleginak.

Justizia.net-eko liburutegian hizkuntza juridikoaren eraberritzeari buruzko txosten osoa ikus dezakezu.

2011ko irailaren 29ean argitaratua. Honi buruz gehiago irakurri:  Botere Judiziala. Iruzkin bat egin.
  • Partekatu:
  • Email
  • Twitter
  • Facebook

Maite zaitut bai, baina ondasunak ondo banatuta!

Maite zaitut bai, Baina ondasunak ondo banatuta!

Estatu Espainolean lau minutuko bikote bat dibortziatzen da. Datu kezkagarria da oso, larriagoa krisi garai honetan; izan ere,  hipotekak ordaintzeko diruz eskas dabilena are eskasago ibiliko da  abokatuak eta mantenu-pentsioak ordaintzeko.

Hori dela eta, geroz eta bikote gehiagok ondasunen banaketa egiten du.  Aukera honekin hasieratik gauzak argi uzten dira, eta dibortzio kasuan, hartu beharreko erabaki ekonomikoak errazagoak dira.

Zer egin behar da ezkontzaren ondasunen-eraentza horretara biltzeko?

Oso erraza da. Ondasunen bananketako-eraentza egiteko, notarioaren aurrean ezkontza-itunak aurkeztearekin nahikoa da. Ondoren, Errejistrora  jo behar da, bertan jasota gera daitezen. Izapide hau ezkontza ospatu aurretik zein ondoren egin daiteke.

2011ko irailaren 16ean argitaratua. Honi buruz gehiago irakurri:  Erregistro Zibila eta Bake Epaitegiak. 2 Iruzkinak.
  • Partekatu:
  • Email
  • Twitter
  • Facebook

Koordainketa Justizian. Bai ala ez?

Duela aste batzuk Justizian Koordainketa ezartzeari buruzko eztabaida hasi zen. Jorge Carbé, Valentziako Justizia eta Gizarte Ongizate Sailburuak proposamena egin zuen: Justiziara jotzen duten enpresa edo norbanakoek  tasa gehigarri bat ordaintzeko . Carbéren ustetan, kaltetuek begi onez hartuko lukete ekimen hori, hain zuzen ere horri esker prozesua arinduko litzatekeelako. 

Hala eta guztiz ere, azken aste hauetan asko izan dira proposamen horren aurka entzun diren ahotsak.

Zer ekarriko luke Koordainketak?

Koordainketa Judiziala, Justiziaren erabiltzaileek –enpresak edo norbanakoak– Justiziaren erabileragatik tasa bat ordaintzea da. Neurri honen helburuen artean lehenengoa auziak arintzea eta zerbitzuaren erabilera okerra egiten dutenei horretan jarraitzeko gogoa kentzea da; bigarrena berriz, dirua aurreztea.

Baina, nork irabazten du neurri horrekin? Kaltetuena herritar xumea da, Justizia eskura izateari utz dieziokeelak; aitzitik, diru kopuru handiak eta abokatu taldeak dituzten enpresek ez lukete tasa hori ordaintzeko inolako arazorik izango.

Zuk zer uste duzu? Justizia guztion artean ordaintzea beharrezkoa dela ala Justizia erabiltzen dutenek tasa berezi hori ordaindu behar dutela?

2011ko irailaren 7ean argitaratua. Honi buruz gehiago irakurri:  Justizia Ministerioa. Iruzkin bat.
  • Partekatu:
  • Email
  • Twitter
  • Facebook