Justizia herritarrengana hurbiltzen

Beatriz Artolazabal izango da Berdintasuna, Justizia eta Gizarte Politikak saileko sailburu berria

Beatriz Artolazabal

Gaur astelehena Euskal Herriko Agintaritzaren aldizkarian argitaratu da 18/2020 Dekretua, irailaren 6koa, Lehendakariarena, Euskal Autonomia Erkidegoaren Administrazioko sailak sortu, ezabatu eta aldatzen dituena eta horien egitekoak eta jardun-arloak finkatzen dituena. Dekretu horren bitartez XII. Legegintzaldiko Gobernuaren egitura osatzen duten sailak eta beren egiteko eta jardun-arloak finkatzen dira.

Asteartean, irailaren 8an, EHAAn argitaratuko dira sailburu berrien izenak eta jarduna utziko duten sailburuenak. Egun horretan bertan Ajuria Enea Jauregian kargua zin egin eta ardurak jasoko dituzte.

Berdintasuna, Justizia eta Gizarte Politikak Sail berriaren buru Beatriz Artolazabal izango da, Lan eta Gizarte Politiken sailburu ohia. (Berdintasun saila berria da eta aurreko Justizia sailburua María Jesús San José zen).

2020ko irailaren 7ean argitaratua. Honi buruz gehiago irakurri:  Eusko Jaurlaritza. Iruzkin bat egin.
  • Partekatu:
  • Email
  • Twitter
  • Facebook

JustiziaEus-eko Aurretiko Hitzordu Zerbitzuak

JustiziaEus-eko Aurretiko Hitzordu Zerbitzuak

Covid-19ak eragindako osasun arloko krisiak irauten duen bitartean JustiziaEus-en hainbat Aurretiko Hitzordu Zerbitzu jarri da abian, herritarrek zein Justiziako profesionalek Euskadiko Justizia Administrazioarekin izapideak egin ditzaten. 

Hitzordua eskatzeko ez duzu identifikazio elektronikorik behar. Dagokizun Aurretiko Hitzordu Zerbitzuan zure datuak sartu eta izapideak egitera joan nahi duzun egoitza judizialean eguna eta ordua aukeratu besterik ez duzu egin behar.

Gaur egun Justizia Administrazioarekin izapideak egiteko bost Aurretiko Hitzordu Zerbitzu daude JustiziaEus-en:

  • Organo judizialak, Fiskaltzak, Gobernu Idazkaritzak eta Zerbitzuak: eremu honetatik hurrengo zerbitzuetan hitzordua eskatu dezakezu: Organo judizialak, Zerbitzu Erkideak, Epaitegi Dekanoa, Arreta eta Informazioa,  Apud Acta Apoderamenduak, Doako Justizia eskaerak (Bilboko, Donostiako eta Vitoria-Gasteizeko Justizia Jauregietan aurrez aurre aurkeztu ezin daitezkeenak), Fiskaltzak, Gobernu-idazkaritza (apostillak) eta Lantalde Psikosozialak.
  • Hasierako idazkiak: Euskadiko Justizia Administrazioan prozedura judizialetako hasierako idazkiak aurkezteko.
  • Erregistro Zibila: ezkontza-, jaiotza- eta heriotza-inskripzioak, nazionalitate espedienteak, nazionalitatea zin egitea, jaiotza-, ezkontza eta heriotza ziurtagiriak, ziurtagirietan akatsak zuzentzea, bizi- eta egoera-agiria…
  • Orientazio Juridikoko Zerbitzua: Bilbo, Donostiako eta Vitoria-Gasteizeko Justizia Jauregietako Orientazio Juridikoko Zerbitzuetan (OJZ) Doako Justizia eskatzeko. 
  • Lan-harremanetako gradudunen Elkargoak / Lan arloko orientazio juridikoa

JustiziaEus-eko Aurretiko Hitzordu Zerbitzuan aurkituko dituzu zerbitzu hauetako bakoitzera sartzeko loturak eta hitzorduak eskatzeko jarraibideak.

2020ko uztailaren 20ean argitaratua. Honi buruz gehiago irakurri:  JustiziaEus-eko zerbitzuak . 7 Iruzkinak.
  • Partekatu:
  • Email
  • Twitter
  • Facebook

Lan-poltsak, Euskal Autonomia Erkidegoko Justizia Administrazioan aldi baterako lanpostuak betetzeko

Lan poltsak irekitzea

Euskal Autonomia Erkidegoko aldi baterako lanpostuak betetzeko lan-poltsak sortzea, honako lanbide hauetan: auzitegi-medikuak, prozesu eta administrazio kudeaketa, prozesu eta administrazio izapidea eta laguntza judiziala.

Parte hartzeko betekizunak: Lan-poltsetan sartzeko eska dezakete, aurreko puntuan aipatutako kidegoetako batean sartzeko deitutako azken hautaprobetan (2016ko lan-eskaintza publikoa) parte hartu zuten pertsonek, baldin eta honako baldintza hauek betetzen badituzte:

  • - Ariketaren bat gainditu dute baina ez dute plazarik lortu.
    - Lehenengo ariketako kalifikazioa 0 puntutik gorakoa izan dute.
  • Espainiako nazionalitatea dute.
  • Adinari dagokionez, 18 urte beteta izatea baina nahitaezko erretirorako adina ez izatea.
  • Justizia eta Administrazio Publikoko sailburuaren 2010eko irailaren 16ko Aginduan ezarritakoak.

Eskariak eta beharrezko dokumentazioa aurkeztu: Lan-poltsetan parte hartzeko eskabide telematikoan sartu.

  • Eskaerak bide telematikoak erabiliz bakarrik aurkez daitezke; horretarako, Eusko Jaurlaritzak onartuta dituen sinadura elektronikoaren ziurtagiriak erabili beharko dira, besteak beste:
    - Izenpek ematen dituen pertsona fisikoentzako ziurtagiriak, B@kQ barne.
    - Sinadura elektronikoaren ziurtagiriak (pertsona fisikoarenak), Diruaren eta Zerga-zigiluaren Fabrika Nazionalaren software-formatuan.
    - NAN elektronikoa.
  • Epea: 30 egun baliodun oinarriak EHAAn argitaratzen diren egunetik zenbatzen hasita (eskaera aurkezteko azken eguna 2020ko abuztuaren 20an, egun hori barne).
  • Eskaera bakarra aurkez daiteke kidegoko lan-poltsa bakoitzean.

Behin-behineko zerrendak: JustiziaEus web-orrian eta Justiziako langileen atarian argitaratuko dira. Zerrenda horien aurka alegazioak aurkez daitezke, argitaratzen diren egunetik hamar egun balioduneko epean.

Behin betiko zerrendak: JustiziaEus web-orrian eta Justiziako langileen atarian; horrez gain, behin betiko ebazpenaren laburpena argitaratuko da Euskal Herriko Agintaritzaren Aldizkarian.

Errekurtsoak: Lan-poltsak irekitzeko ebazpenaren aurka gora jotzeko errekurtsoa aurkez daiteke, Euskal Herriko Agintaritzaren Aldizkarian argitaratu eta biharamunetik zenbatzen hasita hilabeteko epean.

2020ko uztailaren 9ean argitaratua. Honi buruz gehiago irakurri:  Trebakuntza eta enplegu publikoa. Iruzkin bat egin.
  • Partekatu:
  • Email
  • Twitter
  • Facebook

Nola eskatu behar dut hitzordua Doako Justizia galdegiteko?

Eskatu hitzordua Doako Justizia galdegiteko

Doako Justizia eskaerak Orientazio Juridikoko Zerbitzuan aurkeztu behar dira (OJZ). Zerbitzu honek Euskadiko hiru hiriburuetan ditu bulegoak, eta bertan arreta eta informazioa ematen zaie herritarrei Doako Justizia lortzeko prozesuan. Doako Justizia nork jaso dezakeen eta eskatzeko bete behar diren baldintzak eta baloratzeko irizpideak zein diren jakiteko, JustiziaEus-eko OJZren atala kontsultatu ezazu

COVID-19ak eragindako krisiak irauten duen bitartean, Euskadiko egoitza judizialetara sartzeko ezinbestekoa da hitzordua eskatzea. Hortaz, datozen hilabeteetan Doako Justizia galdegin behar baduzu, Orientazio Juridikoko Zerbitzuan hitzordua eskatu beharko duzu JustiziaEus-eko Aurretiko Hitzordu Zerbitzuaren bitartez.

Doako Justizia eskatzeko hiriburuetako batera joatea ezinezkoa bazaizu, zure barruti judizialeko Dekanotzan aurkeztu dezakezu eskaera (Amurrio, Azpeitia, Balmaseda, Barakaldo, Bergara, Durango, Eibar, Gernika-Lumo, Getxo, Irun eta Tolosa), hark OJZra bidali dezan. Kasu horretan, Organo Judizialak, Fiskaltzak, Gobernu Idazkaritzak eta Zerbitzu Erkideak: aurretiko hitzordua eremuan eskatu beharko duzu hitzordua.

2020ko uztailaren 2ean argitaratua. Honi buruz gehiago irakurri:  Covid-19. Iruzkin bat egin.
  • Partekatu:
  • Email
  • Twitter
  • Facebook

Familia Bitartekaritzako Euskal Zerbitzuak jarduera presentzialari ekin dio berriz

Familia Bitartekaritzako Euskal Zerbitzua

Familia Bitartekaritzako Euskal Zerbitzua Eusko Jaurlaritzako Enpleguko eta Gizarte Politiketako Sailaren mendekoa da; jarduera presentzialari ekin dio berriz Araban, Bizkaian eta Gipuzkoan, zeina eten egin behar izan baitzen, konfinamenduaren eta alarma-egoeraren ondorioz, martxoaren 16an.

Familia Bitartekaritzako Zerbitzua familiei arreta emateko eta esku hartzeko auzibidetik kanpoko zerbitzua da; espazio neutral bilakatzen da edozein gatazkaren aurrean elkarrizketa berreskuratzeko bitartekaritzaren bidez. Doako zerbitzua da, eta zuzenean jo daiteke hartara; alegia, ez dago zertan beste eremu batetik bideratu.

Beatriz Artolazabal Eusko Jaurlaritzako Enpleguko eta Gizarte Politiketako sailburua, Familia Bitartekaritzako Euskal Zerbitzuak Donostian (Larramendi kalea, 1) dituen lokalak bisitatu ditu, arreta presentzialari berriz ekiteko xehetasunak aurrez aurre ezagutzeko; higiene-neurri zorrotzak beteko dituzte, eta manparak jarri dira.

Araban, Familia Bitartekaritzako Euskal Zerbitzua Santa Olaja de Acero kaleko 1. zenbakian dago, eta, Bizkaian, Santutxu kaleko 69. zenbakian, Bilbon. Uztailetik aurrera, beste lokal bat irekitzea aurreikusten da; Tolosan egongo da, udalerri horretako udalarekin sinatutako akordio baten ondorioz. Prim kaleko 14. zenbakian egongo da.

Bitartekaritza-zerbitzu horrek aurretiko hitzorduarekin jarraituko du lanean, pandemiaren aurretik bezala, honako telefono hauen bidez: 943-57 62 08 (Gipuzkoa); 945 17 11 25 (Araba)  eta  94 427 77 88 (Bizkaia).

“Etapa gogor honetan, hainbat arazo azaleratu dira, eta beste batzuk azaleratzeko geratu dira. Baina behar izan zaituzteten pertsonek Familia Bitartekaritzako Euskal Zerbitzuaren laguntza izan dute. Hala, bada, eskerrak eman nahi dizkizuegu, egunero eta bereziki orain, Covid-19ak ekarri duen krisiaren ondoren egiten duzuen lan garrantzitsuagatik”, esan die Artolazabal sailburuak Familia Bitartekaritzako Euskal Zerbitzuko langileei.

Alarma-egoera honen hasieran, Familia Bitartekaritzako Euskal Zerbitzuak zerbitzuak izan zituen zabalik telefonoaren eta posta elektronikoaren bidez; ekipoak eratzen dituzten pertsonek txandak egin zituzten, kutsadurarik egon ez zedin. Gero, mugimenduak mugatuta egon zirenez, hiru lurraldeetako Familia Bitartekaritzako Zerbitzuetan jasotzen ziren deiak hiru bitartekaritza-taldeetako profesionalen telefonoetara desbideratzen hasi ziren, joan-etorririk egin behar ez izateko.

Dei-desbideratze horri esker, herritarrentzako arretarekin jarraitu ahal izan da, une oro. Hala, aldi horretan, Familia Bitartekaritzako Euskal Zerbitzuak 2.181 pertsonari eman die arreta, guztira, eta, haietatik, 1.395 emakumeak izan dira. Arreta jaso duen pertsona-kopuru horretan, konfinamenduan sortu diren eskaerei eman zaie arreta, bai eta alarma-egoeraren aurretik ordurako bitartekaritza-prozesu batean parte hartzen zutenei edo hasteko hitzordua zeukatenei.

Familia-berrantolaketa

Familia Bitartekaritzako Euskal Zerbitzuak konfinamenduan tratatu dituen kasuistika berriak direla eta, nabarmentzekoa da, esaterako, aitek eta amek seme-alaben edo mendeko pertsonen alde –etxean egotera behartuta, eguneko zentroak itxi zituzten kasuetan– familia berrantolatzeko hartutako erabakia.

Hala, egoera batzuetan bananduta bizi ziren bikote batzuek berriro batzea erabaki dute, seme-alabak joan-etorrian ibili behar ez izateko eta, hala, kutsatzeko aukerak murrizteko. Halaber, zaintza partekatuen zenbait kasutan, bikote batzuek adingabearentzat baldintza onenak betetzen zituen gurasoarekin egonaldia egiteko bide ematea erabaki da, besteak beste lanbidea aintzat hartuta.

Era berean, zenbait kasutan, familia batzuek beren aita edo ama nagusia zaindu ohi duen pertsona aldatzea erabaki dute, haren ongizatearen alde, eta, hala, zaintzarako ohiko semea edo alaba aldatzea.

“Harrituta utzi gaitu pertsona askok egokitzeko duten gaitasuna. Ikusi dugu akordioetara iristeko gai izan direla, beren autoikaskuntzari esker”, esan du Gurutze Lopetegi Donostiako bulegoko arduradunak.

Era berean, Arabako, Bizkaiko eta Gipuzkoako Familia Bitartekaritzako Euskal Zerbitzuak jarraitu du deiak egiten, bai bitartekaritza-espedientea amaituta zeukaten pertsonei, bai prozesua oraindik abian dutenei.

“Lan horrek aukera eman digu nola antolatzen ari diren eta osasun-alarma eta konfinamendu egoera nola bizi duten jakiteko. Arreta horri esker, informazioa eta laguntza eman dizkiegu, entzute aktiboaren eta beren egoeraren ulermenaren bidez. Batik bat, lehen asteetan, familiek asko eskertu dute beraiei entzun izana eta konfinamenduan beren egoeraren segimenduaren inguruko interesa zuen zerbitzu publikoaren deia jaso izana”, esan du Gurutze Lopetegik.

2020ko ekainaren 26ean argitaratua. Honi buruz gehiago irakurri:  Eusko Jaurlaritza. Iruzkin bat egin.
  • Partekatu:
  • Email
  • Twitter
  • Facebook