Justizia herritarrengana hurbiltzen

Erlijio-akordioetatik hogei urte

Erlijio-akordioetatik hogei urte

1992. urtera arte atzera egin dezagun. Urte hartan Estatuak Lankidetza Hitzarmenak sinatu zituen musulmanekin, juduekin eta ebanjelikoekin. Akordio horiek Vatikanoarekin 1979an sinatutako ereduetan oinarritu ziren. Akordio horietan hurrengo hauek aitortu ziren: kultu tokiak, ezkontza erlijiosoaren eragin zibila, erlijio laguntza Indar Armatuetan, erlijio laguntza eta erlijio-heziketa izateko eskubidea eta araubide fiskala. Era berean, honako eskubide hauek ere aitortu zitzaizkien: euren jaiak ospatzeko eskubidea eta berezkoak dituzten izenak erabiltzeko eskubidea (Kosher edo Halal, adibidez. Bi izen horiek juduek eta musulmanek euren erlijioak onartutako elikagaiei ematen zaizkien izenak dira, hurrenez hurren).

Urte hartan, Erakunde Erlijiosoen Erregistroaren arabera, 541 erakunde ebanjeliko, 13 komunitate judu eta 44 komunitate musulman zeuden. Aurtengo urtarrilean, berriz, 1.987 erakunde ebanjeliko, 28 komunitate judu eta 1.251 komunitate musulman zeuden. Gainera, Justizia Ministerioaren menpe dagoen Aniztasuna eta Elkarbizitza Fundazioak emandako datuen arabera, Estatuan 1.200.000 musulman, milioi bat inguru protestante eta 35.000 judutar bizi dira.

Ikusten duzuen bezala, bi hamarkadatan erlijio horietako fededun kopuruak gora egin du. Halere oraindik urrats asko egiteko daudela ohartarazi dute. Adibidez, PFEZ-ko dirua bideratzeko aukera mugatua dela adierazi dute: edo GKEtara edo Eliza Katolikora bidera daiteke, ez beste erlijio batzuetara. Horrez gain, eskoletako jantokietako menuak adingabearen erlijiora egokitzeko ere eskatu dute.

Zuk zer uste horren inguruan?
 

2013ko otsailaren 15ean argitaratua. Honi buruz gehiago irakurri:  Araudien azken berriak. Iruzkin bat egin.
  • Partekatu:
  • Email
  • Twitter
  • Facebook

Epaileak eta fiskalak greban. Zer aldarrikatzen dute?

Epaileak eta fiskalak greban.  Zer aldarrikatzen dute?

Hainbat hilabetez Justizia Ministroarekin aurrera eta atzera ibili ostean otsailaren 20an, asteazkenez, epaileek eta fiskalek greba egingo dute.    Erabakia irmoa da, baina deialdia bertan behera uzteko prest daude, Gallardonek Botere Judizialaren Kontseilu Nagusian Legearen erreformak geldiarazten baditu.

Greba hainbat elkarteren arteko batzordeak deitu du.  Demokraziarako Epaileak, Francisco de Vitoria Elkarteak, Foro Judizial Independenteak, Fiskalen Batasun Progresistak eta Fiskalen Elkarte Profesional eta Independenteak osatzen dute batzorde hori. Epaileen Elkarte Profesionala eta Fiskalen Elkartea  ere Batzordeko partaide diren arren ez dute ekimenarekin bat egin.

Baina, argi al daukagu zer aldarrikatzen duten?

Botere Judizialaren Lege Organikoaren proiektuaren erreforma bertan behera utz dezatela. Epaileek eta fiskalek ordezko epaileak kendu izana  eta beste organo batzuen lana epaile titularrek derrigorrez beren  gain hartu behar izatea  salatzen dute.

BJKNren erreformaren aurreproiektua gelditu dezatela. Greba deialdia egiten dutenek, erreformaren ondorioz BJKN Justizia Ministerioaren menpe geldituko dutela salatu dute.
Tasa judizialik ez. 
Elkarteek adierazitakoaren arabera, iazko datuekin alderatuz gero  Tasen Legea indarrean jarri zenetik %25 jaitsi da auzi kopurua. Tasa judizialek herritarrei euren eskubideak defendatzeko izan dezaketen asmoa kentzen dietela salatu dute.
Inbertsio handiagoa Justizian. Langile gehiago eta aurrekontu handiagoa eskatzen dute.
Indultu legearen erreforma. Indultuak ematerakoan zorroztasun handiagoa eskatzen dute.
Etxe-kaleratzeak, Erregistro Zibila eta Zigor Kodea. Hipoteka betearazpenek kaltetutako familiei babes handiagoa ematea eskatzen dute eta Erregistro Zibilaren pribatizazioaren aurka daude. Zigor Kodearen erreforma “inprobisatua” dela ere salatu dute. 

Herritarra zaren heinean, zer iruditzen zaizu Justiziak egun bizi duen egoera? 
 

2013ko otsailaren 11ean argitaratua. Honi buruz gehiago irakurri:  Botere Judiziala. Iruzkin bat egin.
  • Partekatu:
  • Email
  • Twitter
  • Facebook

Edozein kondenatu indultatu al daiteke?

Edozein kondenatu indultatu al daiteke?

Azken aste hauetan indultuari buruz zabal hitz egin da, baina, ba al dakigu zer den? Epai irmoz kondenatutako pertsona bati indultua ematean, zigorraren zati bat edo zigor osoa kentzen zaio, baina ez ditu zigor aurrekariak galtzen. 

Indultua mesede-neurria da, salbuespenetan ezartzen da, eta Espainiako erregeak erabakitzen  du ematea Justizia ministroak egindako proposamenaren gainean. Horren aurretik proposamena Ministroen Kontseiluan eztabaidatu behar da. Neurri hau edozein presok eska dezake; ez da delitu-mota kontuan hartzen. Hala ere hurrengo kasuetan ezin da eskatu: Zigor arloko prozesua amaitu gabe badago eta presoa epai irmoz zigortua izan ez bada, presoa  zigorra betetzeko Auzitegi epai-emailearen esku ez badago, edo epai irmoz zigortutako delitu berean edo beste batean berrerori bada. 

Bi indultu mota daude: Indultu osoa edo zati batekoa. Indultu osoan oraindik bete gabeko zigor guztiak kentzen dira. Zati batekoan, berriz, ezarritako zigorretako bat, batzuk, edo oraindik bete gabeko zigorraren zati bat kentzen da.

Zigortutako pertsonak indultua jasotzeko bi baldintza daude:  Batetik, presoa aske geratzeak ez du beste pertsonengan inolako kalterik eragin behar, eta ez ditu beste pertsonen eskubideak urratu behar. Bestetik, ezinbestekoa da alderdi ofendituari entzun izana.

Indultua presoak berak, edo bere izenean bere senideek edo beste edozein pertsonak eska dezake.  Horretarako, presoaren gizarteratzea egiaztatzen duen dokumentazio guztia bidali behar zaio Justizia ministroari. Epaitegi eta auzitegi batek baino gehiagok zigortu badute, indultua eskatzen duen zigor bakoitzeko eskaera bat aurkeztu behar da. Gainera gomendagarria da lanean eta familian birgizarteratu dela egiaztatuko duten ziurtagiriak aurkeztea. Desintoxikazio prozesu bat egin badu, horri buruzko informazioa ere bidali behar da.

Neurri horri buruzko informazio gehiago nahi baduzu, Justizia Ministerioak bere web atarian indultuari buruzko atal bat dauka; bertan bete beharreko inprimakia ere eskuratu dezakezu.  
 

2013ko otsailaren 7ean argitaratua. Honi buruz gehiago irakurri:  Justizia Ministerioa. Iruzkin bat egin.
  • Partekatu:
  • Email
  • Twitter
  • Facebook

Nazionalitate espedienteen pilaketa

Nazionalitate espedienteen pilaketa

Zain. Milaka atzerritar egoera horretan daude, oraindik ez direlako beraien nazionalitate eskaerak ebatzi.  Ekainean 466.000 espediente zeuden pilatuta eta Justizia Ministerioak, pilaketarekin amaitzen saiatzeko, erregistratzaileekin akordio bat sinatu zuen eta Izapidetzako Plan Trinkoa ezarri zuen. Era horretara, orain Jabetza, Merkataritza eta Ondasun Higiezinen Elkargoetako mila erregistratzailek atzerritarrek aurkeztutako dokumentazioa zuzena dela eta osatu beharra dagoen ala ez egiaztatzeaz arduratzen dira. Ordura arte horretaz arduratzeko 40 funtzionario bakarrik zeuden.

Neurri horrekin Alberto Ruiz-Gallardón Justizia ministroak espedienteak 2012 urtea amaitu aurretik ebatziko zirela agindu zuen. Hala ere, urtarrilaren erdira arte 258.000 kasu ebatzi dira. Espediente guztiak digitalizatu badira ere, eta prozesu guztia arindu eta zentralizatu duen plataforma informatikoa diseinatu den arren, nazionalitate espedienteen pilaketarekin amaitzeko udara arte itxaron beharko dela uste du Juan Bravo Justiziako idazkariordeak. 

Atzerapen hori gutxi balitz, dokumentazioa Erregistratzaileen Elkargora lekualdatu zenean  sarrera ordena galdu egin zen eta kasuak ez dira sarrera ordenan ebazten ari.Hori dela eta, 2012. urtean egindako hainbat eskaera ebatzita daude, baina aurreko urteetako eskaera batzuk ebazteko zain  daude.

Nazionalitate eskaeraren ebazpenaren zain zaude? Kontaiguzu zein den zure egoera!

2013ko urtarrilaren 17ean argitaratua. Honi buruz gehiago irakurri:  Erregistro Zibila eta Bake Epaitegiak. 52 Iruzkinak.
  • Partekatu:
  • Email
  • Twitter
  • Facebook

Ziberjazarpena salatu

Ziberjazarpena salatu

Gizarte-sareak komunikatzeko era berria dira, baina arriskutsuak ere izan daitezke.    Identitate faltsu baten atzean edonor ezkuta daiteke, eta mehatxatu edo derrigortu egin zaitzake. Bitarteko hauen erabileraren gorakadak psikologikoki erasotzeko era berri baten agerpena eragin du: ziberjazarpena . Anonimotasunean babestuta iraindu, jazarri eta mehatxatu egin zaitzakete. Hala ere, beldurraren eraginez, kaltetutako pertsonek ez dituzte beti gertaerak salatzen.

Estatuko Segurtasun Indarrek emandako datuen arabera, 1.187 salaketa aurkeztu ziren 2010. urtean internet bidezko mehatxu eta derrigortzeak salatzeko. Urte osoari buruzko datu guztiak biltzen dituen azken txostena da 2010 urtekoa. 2006. urteko datuekin alderatuz gero, salaketa kopurua bost aldiz handiagoa da. Datuok Barne Ministerioak CIUko Corali Cunyat senatariari eman dizkio eta La Vanguardia egunkariak eman ditu argitara.

Ziberjazarpenak adingabeak bereziki kaltetzen ditu. Protégeles, Save the children eta Fundación de Ayuda a Niños y Adolescentes en Riesgo (Anar)GKEk hurrengo aholkuak ematen dituzte: Mezuak ez erantzun, baina bai gorde, eta gurasoei, irakasleei edo elkarte hauetakoren bati gertaeraren berri eman. 

Ertzaintzaren web atarian ere zenbait aholku jasota daude: Adingabeei zuzendutakoak:

  • Ez eman ez zure benetako izena, ez eta telefonoa, helbidea edo senideen daturik ere.
  • Ez lotu inoiz hitzordurik ezezaguna den pertsona batekin, eta interneten eduki desegokiak ikusten badituzu zure gurasoak jakinaren gainean jar itzazu.
  • Argazkiak edo bideoak doan ikusteko programa piratarik ez instalatu.

Eta gurasoei zuzendutakoak, berriz:

  • Seme-alaben nabigazioa gidatu edo/eta gainbegiratu ezazu.
  • Edukien iragazkiak dituzten programak instalatu eta adingabekoentzat egokiak ez diren edukiak mugatu itzazu.
  • Telefono enpresari 903 eta 906 zenbakietara egindako deiak blokeatu ditzala eska iezaiozu. Dei horiek eragozten dituzten programak ere instalatu daitezke.

Baina, batez ere, jazarpenaren biktima bazara, salatu ezazu.

 

2013ko urtarrilaren 14ean argitaratua. Honi buruz gehiago irakurri:  Justizia digitala. Iruzkin bat egin.
  • Partekatu:
  • Email
  • Twitter
  • Facebook